ondragstart="return false" onselectstart="return false"

Friday, August 27, 2010

တပ်မမှူးနှင့်တိုင်းမှူးအချို့ ရာထူးအပြောင်းအလဲလုပ်၊ ဒု-ဗိုလ်ချုပ်ကြီးများ နုတ်ထွက်

ခိုင်လင်း / ၂၇ သြဂုတ် ၂၀၁၀

နအဖစစ်တပ်အတွင်း တပ်မမှူးနှင့် စစ်တိုင်းမှူးအချို့ ရာထူးတိုးမြှင့်ခဲ့ပြီး ကာကွယ်ရေးဝန်ကြီးဌာနရှိ ဒု-ဗိုလ်ချုပ်ကြီး အတော်များများ စစ်ဘက်ရာထူးမှ နုတ်ထွက်ကာ ရွေးကောက်ပွဲဝင်ရန် ရှိသည်။

ယနေ့မှစတင်၍ တပ်မမှူးများကို စစ်တိုင်းမှူးအဖြစ်လည်းကောင်း၊ စစ်တိုင်းမှူးများကို ကာကွယ်ရေးဝန်ကြီးဌာန၊ အထူးစစ်ဆင်ရေးအဖွဲ့ (ကစထ) မှူးအဖြစ်လည်းကောင်း ရွှေ့ပြောင်းမှု စတင်ခဲ့သည်ဟု အရှေ့မြောက်တိုင်း စစ်ဌာနချုပ် အသိုင်းအဝိုင်းနှင့် နီးစပ်သူတဦးက ပြောသည်။

တပ်မ (၃၃) တပ်မမှူး ဗိုလ်မှူးချုပ် အောင်ကျော်ဇောအား ယနေ့မှစ၍ အရှေ့မြောက်တိုင်း စစ်ဌာနချုပ် (ရမခ) တိုင်းမှူးအဖြစ် ခန့်အပ်လိုက်ပြီး ရမခ တိုင်းမှူး ဗိုလ်ချုပ် အောင်သန်းထွဋ်အား ကစထမှူးအဖြစ် တာဝန် ပြောင်းရွှေ့ခဲ့ကြောင်း၊ တပ်မ (၂၂) တပ်မမှူးအား အနောက်တောင်တိုင်း (နတခ) တိုင်းမှူး ဗိုလ်ချုပ်ကျော်ဆွေ နေရာတွင်လည်းကောင်း၊ တပ်မ (၉၉) တပ်မမှူးအား ကမ်းရိုးတိုင်း တိုင်းမှူး ဗိုလ်ချုပ် ခင်ဇော်ဦး နေရာတွင်လည်းကောင်း၊ တပ်မ (၈၈) တပ်မမှူးအား တောင်ပိုင်းတိုင်း စစ်ဌာနချုပ် (တပခ) တိုင်းမှူး ဗိုလ်ချုပ် လှမင်းနေရာတွင် လည်းကောင်း ပြောင်းရွှေ့တာဝန်ချထားခဲ့သည်ဟု အရှေ့မြောက် တိုင်းစစ်ဌာနချုပ် အသိုင်းအဝိုင်းနှင့် နီးစပ်သူတဦးက ပြောသည်။

၎င်းက “တပ်မမှူးတွေက တိုင်းမှူးတွေ တက်ဖြစ်ခဲ့တယ်။ တပ်မ (၁ဝ၁) က ဗိုလ်မှူးချုပ် စိန်ဝင်းတယောက်ကတော့ နိုင်ငံခြားရေးဌာနကို ရောက်သွားတယ်။ လက်ရှိ ကစထမှူးတွေ (၆) ယောက် ရှိတယ်။ အားလုံး စစ်တပ်က အနားယူ၊ ရွေးကောက်ပွဲ ဝင်ရမယ်ဆိုပြီး သတင်းထွက်နေတာ (၃) ရက်လောက်ရှိပြီ” ဟု ပြောသည်။

စစ်တိုင်းများကို ထပ်ဆင့်ကွပ်ကဲနေရသည့် ကစထမှူး (၆) ဦး ရှိနေပြီး ၎င်းတို့မှာ ဒု-ဗိုလ်ချုပ်ကြီး ခင်ဇော်၊ ဒု-ဗိုလ်ချုပ်ကြီး မင်းအောင်လှိုင်၊ ဒု-ဗိုလ်ချုပ်ကြီး သာအေး၊ ဒု-ဗိုလ်ချုပ်ကြီး မြင့်ဆွေ၊ ဒု-ဗိုလ်ချုပ်ကြီး ကိုကိုနှင့် ဒု-ဗိုလ်ချုပ်ကြီး အုန်းမြင့်တို့ဖြစ်သည်။

နအဖ စစ်တပ်အတွင်း ယခုကဲ့သို့ ရာထူးအပြောင်းအလဲ လုပ်ကာ စစ်ယူနီဖောင်း ချွတ်စေပြီး ရွေးကောက်ပွဲတွင် အမတ်အဖြစ် ဝင်ရောက်အရွေးခံရန် ပြင်ဆင်နေသကဲ့သို့ ၂ဝဝ၈ ဖွဲ့စည်းပုံအရ ပြည်ထောင်စု လွတ်တော်နှင့် တိုင်းဒေသကြီးနှင့်ပြည်နယ်လွှတ်တော်များတွင် အမတ်နေရာ၏ (၂၅) ရာနှုန်းအတွက် တပ်မတော်သားများအား ကာကွယ်ရေးဦးစီးချုပ်က တိုက်ရိုက်ခန့်အပ်မည်ဖြစ်၍ အနာဂတ်လွှတ်တော်တွင် စစ်ယူနီဖောင်းချွတ်နှင့် စစ်ယူနီဖောင်းဝတ်များသာ ကြီးစိုးရန် အလားအလာ ရှိနေကြောင်း နိုင်ငံရေးအကဲခတ်များက ဝေဖန်နေကြသည်။

ဗိုလ်ချုပ်မှူးကြီး သန်းရွှေနှင့် ဒုတိယ ဗိုလ်ချုပ်မှူးကြီး မောင်အေးတို့လည်း စစ်ဘက်ဆိုင်ရာတပ်ရာထူးများမှ နုတ်ထွက်လိုက်ကြောင်း အတည်မပြုနိုင်သေးသည့် သတင်းများ ထွက်ပေါ်နေသည်။
http://www.khitpyaing.org/index.php?route=detail&id=3900

No comments:

Post a Comment